دخان سيجارة
ايتاليكا - (اسم مستعار. الاسم الحقيقي محفوظ لدى الموقع)
09\04\2011
_ حبيبتي خذي شفي صغيري مشاني..
_ ما بقدر حرام.
_ بالحب ما في شي إسمو حرام.
_ بخاف من أهلي رح يزعلو مني
_ إنتي اليوم مرتي وما حدا إلو عندك، نسي أهلك وكل العالم.
_ بس..
_ مشاني حبيبتي ..
_ طيب شفي وحدي بس..
_ مسكي السيجارة بإيدك.. شوفي قديش لذيذ الدخان..
_ اتفقنا شفي وحدي..
_ بس سيجارة، بتغريني وإنتي عمتدخني..

*****
_ اليوم بدي ذوّقك مشروب ما ذقتي منو بحياتك..
_ شو هوي؟
_ نبيذ أحمر.
_ يع.. مر..
_ حبيبتي بس أول مرة صعب بعدين بتتعودي عطعمو.
_ مش طيب..
_ يا روحي مش مهم تستطيبيه المهم المفعول تبعو..
_ أمرك.
_ كيف حاسي؟
_ إحساس كثير حلو.. صبلي بعد.
*****
_ شو حبيبي من أمتا صاير تأرغل؟
_ هي الأرغيلي إلك حياتي..
_ إلي؟!! بس أني ما بأرغل..
_ شو المشكلي؟ بتتعلمي..
_ بكفي يلي صرت متعلمتو .. ما بدي أخذل أهلي أكثر..
_ قلنا وإنتي معي بتنسيلي أهلك، ما إلهن علاقة فينا..
*****

بعد مضي سني..
_ حبيبي جبلي معك دخان أو معسل للأرغيلي.. وجيب قنينة نبيذ ما ظل عنا..
_ ما معي مصاري..
_ حبيبي مش قادري بحياتك راسي بدو ينفجر..
_ قلتلك فش وبعدين بدك تبطليها هالعادي..
_ مش بإيدي وحياتك غصب عني.. عبحاول بس مش عبنجح.
_ إي تحملي شوي.. معك معك بتتعودي.
_ عبقلك مش قادري لك إنت ما بتحس؟
_ هوهو علينا، عنجد الواحد من نقك معش إلو نفس يفوت عالبيت.. أصلا أني بدي إحكي لأهلك يلاقولي صرفي معك..

*****
_ شو القصة يا إبني شو في؟
_ والله يا مرت عمي بنتك بدها تجنني..
_ ليش شو بها؟
_ بدها تدخن وتأرغل وأني بعرف إنو إنتو بترضووش..
_ يا ذلي بنتي أني بتدخن؟
_ أني ما كنت حابب قلكن بس يعني مصروفها كثير زاد وأني مش قادر إتحمل أكثر..
_ كثير خيرك يا إبني يلي جيت وحكيت نحنا منقبلش هالتصرف..
_ أني يا مرت عمي مشان الفضيحة مكنتش بدي إحكي..بس إنتو أهلها لازم تعرفو..
_ بارك الله فيك..
_ البنت بنتكن إنتو ربوها، أني معش قادر كفي معها بدكن تعذروني.
_ يا إبني ستور علينا الله يخليك..
_ عن لساني مش رح تسمعو ولا كلمي، غير هيك فييش أوعدك بشي، فيكن تروحو تجيبوها.
_ الله محيي أصلك، يا ريت كل الشباب متلك بحبو يحافظو عبنات البلد، لكانت الدنيا بألف خير.